Бүгүн, аталган окуу жайдын химия-металлургия факультетинин деканы Донияров Нодиржон Абдихакимович, энергетика жана механика факультетинин деканы Каршибаев Аскарбек Илашевич Кыргыз-Өзбек Эл аралык университетинде болушту.
Коноктор алгач окуу жайдын базасы менен жакындан таанышып чыгышты. Андан соң Кыргыз-Өзбек Эл аралык университетинин ректору, профессор Мамасыдыков Абдилбает Асанович менен жолугуп, эки тараптуу кызматташуу келишимине кол коюшту.
Навои атындагы мамлекеттик тоо-технологиялык университети Өзбекстан Республикасында жайгашкан тоо-кен жана технология тармагындагы эң ири окуу борборлорунун бири болуп саналат. Университет Өзбекстан Республикасынын Президенти Шавкат Мирзиёев тарабынан 2018-жылдын февраль айында негизделген.
Университет тоо-кен, жеңил өнөр жай, информатика, дизайн, медицина жана башка багыттарда бакалавр, магистратура жана докторантура деңгээлинде кадрларды даярдайт.
