Жыл сайын 23-февралда белгиленип келе жаткан Мекенди коргоочулар майрамы эрдиктин, каармандыктын жана чыныгы мекенчилдиктин символу! Мекенчилдик – бул колуна курал кармап, мекен чегин коргоп туруу менен эле чектелбейт. Ал билим берүү, илим изилдөө аркылуу улуттун улуулугун көрсөткөн каада-салтты сактап, элдик маданиятты, улуттук баалуулуктарды өркүндөтүү менен да бааланат. Өлкө ичиндеги баардык этностордун биримдигин бекемдеп, достуктун туусун желбиретип, бейпил турмуштун камсыздалышы менен аныкталат. Демек, биздин ар бирибиз мекенди коргоочуларбыз деп ишенимдүү айта алабыз.
Агартуу тармагынын кызматкерлери, айрыкча, жогорку жана орто кесиптик билим берүү мекемелеринин профессордук-окутуучулар жамааты күндөлүк ишинде жаш муундарга кесиптик билим берүү менен эле чектелбей, болочок адистерге мекендин негизги өзөгүн түзгөн калкыбыздын тарыхы, социалдык-экономикалык абалы, дүйнө таанымы жөнүндө кенен маалымат берип, өлкө бүтүндүгү баа жеткис байлык экендигин жеткирүү аркылуу аларды мекенчилдикке тарбиялап келет.
Кыргыз-Өзбек Эл аралык университетинин урматтуу эмгек жамааты, ардактуу студенттер, кымбаттуу мекендештер!
Мекенди коргоочулар күнүнө куттук айтып, ар бирибиздин жүрөгүбүз Кыргызстан, кыргыз жери, кыргызстандыктар деп согушу түбөлүктүү улансын! Мекенибизде достуктун туусу желбиреп, калк ичинде биримдик, урмат-сыйдын учу узарсын!
